Është gjetur koka e gazetares suedeze, Kim Wall, pas dy muajsh nga zhdukja e saj, gjatë një udhëtimit me një marinar danez, shkruan BBC.

Koka e saj është gjetur në një çantë bashkë me dy këmbë, ka treguar inspektori i policisë në Kopenhagë, Jens Moller.

Ndërsa në një çantë tjetër janë gjetur rrobat e saj.

Pjesa tjetër e trupit të gazetares ishte gjetur më parë në detin e Kopenhagës, 11 ditë pasi kishte hipur në një nëndetëse me Peter Madsen me 10 gusht.

46 vjeçari e ka mohuar ta ketë gjymtuar dhe mbytur gazetaren, njofton Klan Kosova.

Inspektori i policisë Moller, ka thënë se pjesët e trupit janë gjetur pas disa kërkimeve në ujërat e detit të Kopenhagës.

Ai ka treguar se çantat janë gjetur në thellësitë e detit të lidhura me pesha të rënda për të qëndruar poshtë.

“Mbrëmë nga forensika na kanë njoftuar se është Kim Wall”.

Në kokën e saj nuk janë gjetur thyerje të kockave.

Wall, 30 vjeçare, herën e fundit e gjallë ishte parë me 10 gusht në mbrëmje derisa po hipte në nëndetësen 40 tonshe të Madsen, të cilën marinari e kishte punuar vet.

Ajo e kishte vizituar atë pasi po punonte në një storie.

Alarmin për mungesën e saj e pati ngritur i dashuri i Kim, pasi gazetarja nuk ishte kthyer më në shtëpi.

Marinari Madsen, i dyshuar për vrasjen e saj, një herë kishte thënë se e kanë përfunduar udhëtimin dhe e ka lënë atë shëndosh e mirë në Kopenhagë, por pastaj e kishte ndryshuar deklaratën duke thënë se ajo ka vdekur aksidentalisht pasi kishte goditur me kokë kapakun e hambarit të nëndetëses.

Ai kishte deklaruar edhe se “e kam varrosur në det trupin e saj”.